ثقافة الشوارعيزم في حالة حمار

من كام يوم أتفرجت علي برنامج (حالة حمار) ... يااااه أقصد ( حالة حوار) دايما أغلط في الاسم ده مش عارف ليه

.. وطبعاَ البرنامج ده دايما بيكون زاخر بضيوفه المعروفين والمشهورين ..

وده كفاية أوي ان مقدم البرنامج ده هو السيد "المثقف" عمرو عبدالسميع صاحب ثقافة الشوارعيزم الشهيرة التي ابتكرها وعرض لها في جريدة الأهرام في إحدي مقالاته

وكعادته دائماً يبدو عمرو عبد السميع كما أظن يعني منتشياً بثقافته متأنفاً عمن حوله

الكل لا يفهم إلا أبو العريف عبدالسميع والكل لا يعرف شيئاً إذن لا داعي لأن يتحدث غيره

يبدو ذلك واضحاً عندما يقاطع أحد الشباب (أقصد في الحلقة التي شاهدتها)

وقبل أن يكمل الشاب الذي يسأل سؤاله يقاطعه عبدالسميع ( زميلك )

وينتقل السؤال إلي أحد الشباب الآخرين قبل أن يقاطعه ( زميلك -- زميلك )

والأمر يبدو وكأنها طابونة عيش (فرن عبش )

مما جعلني أتأكد أنها فعلاً حالة حمار

ويبدو أن دكتور عمرو المثقف يحدد خط سير البرنامج مسبقاً

وده طبعاً بيظهر في محاولة تأثيره علي آراء السادة الضيوف

ومحاولاته المستمره في مقاطعاتهم بلا داعي

فالمهم أن تكون رؤيته هي الغالبة والطاغية ولا قيمة لرأي أحد في مقابل رأي وسياسة عبدالسميع الغراء

في إدارة البرنامج ..

وطبعاً لا يخفي علي أحد جهود عبد السميع المضنية في تلميع وجه السلطة بنظام اللف والدوران

بل لا ينكر احد أيضاً دوره في تلطيخ وجه المعارضة

كما رأينا من قبل دوره في الهجوم علي الإخوان أثناء الإنتخابات البرلمانية الماضية

في محاولات مستميتة لإسترضاء لجنة السياسسات بالحزب الوطني

نرجع بقا للحلقة اللي أنا أتفرجت عليها

المهم .. الشباب اللي هما جمهور البرنامج كانوا عبارة عن طلاب من جامعات مصر المختلفة وشاكلهم كانوا متنقيين علي الفرازة

يعني محدش يتكلم في السياسة .. محدش يتكلم في الإقتصاد ... محدش يتكلم في حالة البلد ... ومحدش يتكلم وخلاص

بس اللي حصل بقا إن كان فيه بعض الطلاب المندسين والمنبوذين اللي أثاروا بعض الأسئلة المثيرة

والعجيب والغريب إن كان واحد من ضيوف البرنامج كان .. جمال بيه مبارك

وأسئلة كتييييرة وجهت له طبعاً بعد مقاطعات السيد عبدالسميع للطلاب

وفضلت مستني لآخر الحلقة عشان أشوف رد جمال بيه علي الأسئلة

لكن اللي حصل بقا بأسلوب اللف والدوران بتاعهم إن السيد جمال رد علي الأسئلة كلها وكأنها سؤال واحد بس

سؤال واحد متضمن نقاط كثيرة ولم يتعرض إلي تخصيص الإجابة علي سؤال محدد

رغم أن بعض المندسين طلب منه الإجابة المحددة علي سؤاله إلا أن التهرب الذكي أهمل كل الأسئلة

وجعلها سؤال واحد يناقش الأبعاد السياسية والإقتصادية في مصر

طبعاً هذا يؤكد حالة الحمار التي لا تعطي مساحة للتفكير أو المناقشة والحوار والإستماع للطرف الآخر

وحالة الحمار هذه تتشابه مع حالات أخري مثل البيض بيضك ... قصدي (البيت بيتك )

- وكمان فيه برنامج جديد هابط اسمه (معاً) علي غرار حالة حمار ونتكلم عنهم في المرة الجاية